Развіцце маўлення – адна з важных праблем у пачатковай школе. Кожны вопытны настаўнік разумее: звесці навучанне маўленню да вывучэння граматыкі нельга, бо маўленне звязана з мысленнем.
Навучыць дзіця гаварыць – значыць навучыць яго думаць. Пазакласныя мерапрыемствы, якія праходзяць у нашай школе ў рубрыцы “Размаўляй са мной па-беларуску” будуюцца так, каб яны не толькі ўздзейнічалі на розум, але і закраналі пачуцці дзіцяці. 6 снежня настаўнікі 2 “А”, 2 “Б”, 2 “В”, 2 “Г” класаў падрыхтавалі і правялі вусны часопіс “Жывельны свет Беларусі”. Каб актывізаваць мысленне вучняў, былі выкарыстаны загадкі, прыказкі, прымаўкі, песні, казкі, інтэлектуальная гульня, інсцэніроўкі казак і разыгрыванне жыццевых сітуацый – прыёмы, якія заўседы дапамагаюць настаўніку выхоўваць у сваіх вучняў пачуццё любові і павагі да роднай зямлі, яе прыродных багаццяў , мовы. Здаецца, гульня, забава, але і ў той самы час дапамагае дзецям па-іншаму паглядзець на навакольны свет, убачыць у побыце незвычайнае ў звычайным (і наадварот). Асобнай увагі заслугоўвае інтэлектуальная гульня краязнаўчага напрамку, якая, па меркаванню настаўнікаў, садзейнічала выхаванню ў вучняў цікавасці да жывельнага свету Беларусі. Але трэба дадаць, што арганізаваная такім чынам дзейнасць нашых школьнікаў дапамагала далучаць іх да багаццяў роднай мовы, выпрацоўвала патрэбу ў набыцці ведаў, развівала кемлівасць, мысленне, увагу, памяць, кругагляд дзяцей. Удзельнікі падзяліліся на дзве каманды – “Азерная” і “Лясная”. Знакі адпаведнага колеру – сінія і зялёныя магніты- каманды былі павінны выстаўляць на гульнявое поле, калі першымі выканаюць заданне. У гульні выйграе тая каманда, якой удасца запоўніць які-небудзь шэраг або дыяганаль сваімі знакамі. Пры падзвядзенні вынікаў вызначалась каманда-пераможца, але настаўнікі ухвалялі ўсіх дзяцей: пераможцы атрымалі медалі “Ты супер!”, астатнія – “Ты малайчына!”.
Створаная на занятку атмасфера творчага пошуку, высокага эмацыянальнага тонусу не стала дадаткам альбо ўпрыгожваннем урока, а з’явілася неабходнай умовай атрымання новых ведаў,бо толькі перажытыя веды становяцца перакананнем.
Настаўнік пачатковых класаў Буевіч Ю.У.
|